لو ابنك طلب منك موبيل هتعمل ايه؟

(اضرار الهاتف المحمول)

اضرار الهاتف المحمول كتير ، و خصوصا انه بأه الطبيعي بين الاطفال انهم يستخدموه.

تعالي نشوف مع بعض لما ابني بيطلب مني موبيل برد عليه ازاي علشان يقتنع انه ليه اضرار هتأثر عليه:

ابني / ماما انا عاوز ايباد وموبيل زي باقي صحابي.
انا / مش هينفع ياحبيبي الحاجات دي مش للاطفال.
ابني / ليه ياماما؟ كل الاطفال اللي اعرفها معاها ايباد او موبيل اشمعني انا؟؟
انا / بس انا عارفه ومقدره انك عاوز بس انا امك ومسئوله اني احميك من الحاجات الخطر.
ابني / تحميني من ايه ياماما؟
انا /

• هحميك من وقت ضايع بلاهدف.
• هحميك من لحظات ومشاعر جميله ممكن تفوتك.
• هحميك من نوم متقطع وعقل محبوس جوه شاشه.
• هحميك من حركة قليله وقدرات مهدوره.
• مهارات اجتماعيه هتصبح معدومه.
• مزاج متقلب ونشاط زائد بلا هدف.
• هحميك من ألم في الرقبه ومشاكل في الابصار.
• انشغالك عن الناس حواليك بموبيل او ايباد.
• انفتاح علي عالم افتراضي مش جاهز دلوقتي لمواجهته.

ابني / بس انا عارف كل المخاطر دي وهتجنبها.

انا / حبيبي لو جيت وقولتلي انا عاوز اروح المحيط بمركب صغير هل انا هوافق انك تسافر المحيط ورغم انك عارف المخاطر اللي هتواجهها؟؟

اكيد انا مش هرميك في البحر الا لما تكون مؤهل لده.

ابني / طيب يعني امته هتجبيلي موبيل؟
انا / ان شاء الله ياحبيبي لما يكون عندك 14 سنه.

ابني / طيب انا هستنى بفارغ الصبر.

حوار بيتكرر كتييييير بيني وبين ابني
انا بسمح ليه انه يستخدم الشاشات بس في اوقات محدده تحت رعايتي ونظري وبيلعب بلاي استيشن او اكس بوكس بالعاب محدده وبنتكلم فيها كمان.

الكثير من الأهل يعتقدون أن الشاشات تُعلم الأطفال أمور عظيمة ويكتسبون منها مهارات عديدة !
ولكنهم لا يعلمون ما يفوتهم من فرص تَعلم أثرى ، وأغنى وتجارب أهم ولا يعلمون أيضًا كم ثمن تلك المهارات الإلكترونية وما الضرر الذي يدفعه الطفل بالمقابل !!!