عايزه ابنك راجل وبنتك ست تفتح بيت

كلنا نفسنا ولادنا يتحملوا المسئوليه ولما الولد يكبر يكون راجل يعتمد عليه و البنت واعيه و تقدر تفتح بيت و تتحمل مسئوليته.

:علشان ده يحصل في خطوات لازم تعمليها

[1] خليه مبدأيا يلبس نفسه او يعتمد علي نفسه زي مثلا عند سن الأربع سنين المفروض انك بتشيلي مساعدتك واحده واحده ، احيانا هتلاقيه بيتأخر اوي اديله فرصته و وقته انه يلبس نفسه واشرحي خطوات بسيطه وشيلي مساعدتك واحده واحده.

[2] خليه يعتمد علي نفسه في تحضير شنطته و برده بخطوات بسيطه و بمساعدتك ، مثلا تجيبي الجدول وتطلبي منه المواد بتاع اليوم وتعلميه يحط كل ماده بكراستها .

[3] اعتمدي عليه في مهام معينه مطلوبه منه في البيت عشان يحس انه ليه دور داخل البيت وفرد مهم في الاسره زي مثلا يوضب سريره او يملا الازايز او حتي ينزل الزباله وعلشان متقعديش تصوتي في الاخر وتقولي كله عليا ، الام العاقله هي اللي بتعلم ولادها وترتاح شويه لأن شغل البيت مبيخلصش.

[4] ابنك بعد لما يلعب تعلميه يشيل ألعابه وبيكون ده من سن صغير بيبدأ من سنتين او حتي سنه ونص ، في الأول هيرفض وهيكون تعبان سيبيه يرتاح وبعدين اطلبي منه انه لازم يلمها في الأول بمساعدتك بعد كده يلمها بنفسه كل لما سنه يكبر .

[5] ممنوع منعا باتا تشيلي شنطة المدرسه وهو عمال يجري حواليكي خايفه عليه والشنطه تقيله ، طلعي كتابين تلاته تشيليهم انما هتستسهلي وتشيلي الشنطه كلها هيتعود علي كده وعمره ماهيشيل شيلته لما يكبر.

[6] اشركي اولادك في جدول الطبيخ بدل لما كل يوم تسألي جوزك السؤال المعهود هنطبخ ايه بكره وطبعا الاجابه بتكون اللي كل ست متعوده عليها “اي حاجه” ????????
طب متعملي جدول كل اسبوع كل واحد نفسه في ايه ونكتبها ونعلقها وبكده محدش هيضايق من الاكل ولا تعملي طبختين في يوم واحد ولو حاجه مش عجباه يبقي عارف ان بكره هتطبخي اللي عاجبه.

[7]

وطبعا مش عيب تماما لما تقولي لابنك وتفهميه ان الفلوس اللي معاكي متكفيش تشتري اللي عاوزه وفي البدايه تقولي مثلا هنختار حاجتين من السوبر ماركت و بعدين واحده واحده بتحددي سعر الحاجتين دول و واحده واحده بتديله هو يشتري وبعدين واحده واحده بتديله مصروف يومه و واحده واحده بتديله مصروف اسبوعي او شهري وممكن كمان تديله حسابات البيت يمسكها ، امال هيبقي راجل او ست يعتمد عليها ازاي وهو متعلمش عندك

[8]

اوعي تدخلي معركه بالنيابه عنه وخصوصا مشكلات المدرسه ، انتي دورك الوحيد انك تتعاطفي وتدعمي ابنك وتحاولي تفتحيله ذهنه انه هو اللي يحل مشكلاته ، المشكلات الصغيره اللي بتحصل قدامك وانتي معاه وهو راجل هتكون مشكلات كبيره وانتي مش عيشاله العمر كله ولازم يتعود يحلها عشان لما يكبر يعرف يحلها وانتي بعيد عنه

للأسف في أمهات وأباء ومدرسين مش مدركين ان الاطفال يقدروا يتكلفوا بمهام او ممكن يكونوا بيستسهلوا او بيسرقوا الفرص المتاحه ان الطفل فعلا يتعلم ، وبالطريقه دي هتطلعوا طفل اتكالي مبيحبش الا نفسه وكل العالم لازم يعامله بنفس الطريقه و لو محدش بيحل او بيشيل عنه هيبقي عايش دور المظلوم اللي محدش بيحبه في دنيته و واحده واحده هيفقد الشغف لو مكلفتهوش بالمهام في سن صغير وترجعي تصوتي محدش بيعمل معايه حاجه وساعتها مش هيعبرك

فعلشان كده لازم نهيأ لاطفالنا البيئة انهم يحاولوا و نؤمن بيهم و انهم يقدروا يقوموا بمهام كتير خاصة لو هم اصلا بيطلبوا يعملوها ، ده بتبأه فرصة لازم ننتهزها و مينفعش نضيعها