طب اسيبهم يستكشفوا ولا انكد عليهم

طب اسيبهم يستكشفوا ولا انكد عليهم

مين فينا معندوش اطفال بيكركبوا ويطلعلك حد يقولك التربيه الايجابيه بتقولك سيبي الطفل يكركب ويلعب ده بيستكشف ، و حد تاني يقولك لا انا مطقش اقعد في الكركبه دي بلا تربيه ايجابيه بلا بتاع.
طب الصح ايه؟؟

انا هقولك التربيه الايجابيه بتقول ايه وهديكي شوية حلول ممكن تساعدك :

[1] خلي قدام الطفل العاب معينه وخليهم في مكتبه أدامه ياخد ويرجع ، في الاول هتلاقي المسأله صعبه لان الاطفال وهم  صغيرين بينهوا كامل طاقتهم في اللعب ومبيسبوش وقت يبقوا عاملين حسابهم فيه انهم يرجعوا ألعابهم فبتبدأي انتي تعرفي الوقت المناسب اللي تقولي فيه يلا نلم ألعابنا او تسيبي وقت استراحه ويرجع يلم ونساعده في الأول عادي في لمها .

[2] التربيه الايجابيه بتقول خليكي حنينه لكن حاسمه يعني يكتشف عادي ألعابه بس كمان لازم يلمها.

[3] الولاد في السن الصغير بيملوا من الالعاب بسرعه فعلشان كده قولتلك متحطيش أدامهم كل الألعاب اللي عندك ، يعني طلعي لعبه او اتنين حطيها في المكتبه وعيني الباقي ، حسيتي ان ابنك زهق طلعي لعبه او اتنبن تانيين وعيني الباقي وهكذا في كل مره هيحس انك بتطلعي ألعاب جديده.

[4] خليكي مثال لابنك يحتذي بيه ، يعني ازاي يبقي بيتك مكركب ودولابك فوق بعضه و وعاوزه ابنك يبأه منظم ، ولادنا مرايه لينا وبيقلدونا .

[5] وفري الامان لأولادك يعني ميبقاش ولادك صغيرين وبيستكشفوا وانتي سايبه سكينه أدامهم ، هم ميعرفوش في السن ده الخطر هم بيقلدوا الكبار وبس ، علشان كده لما بتديله لعبه بلاستيك بيرميها ويجري علي الريموت اللي انتي مسكاه طول النهار فلازم تسيبلهم بيئه آمنه انهم يستكشفوا بس مع الاتفاق انهم يرجعوا الحاجه مكانها .

[6]

أحيانا الأطفال بتخرج الحلل او المعالق من الدولاب المخصص لها ، ماشي خليه يلعب طالما مش خطر يمكن عاوز يسمع صوت الحلل وينمي الانتباه السمعي او يمكن بيفصل المعالق الصغيره عن الكبيره وينمي الانتباه البصري بس لازم الحاجه بعد اما نخلصها ترجع مكانها

أخيرا هقولك تاني ان ولادك مرايه ليكي ، لو انتي منظمه هيكون منظم ولو البيت مكركب او مش منظم برده هيعمل زيك و يكركب