انت مش في صراع مع ابنك

انت مش في صراع مع ابنك
(صراع الابناء)

صراع الابناء : كتير مننا كوالدين بيحس بالاحباط لما بيسمع من طفله انه بيكرهنا وانه نفسه يعيش في مكان تاني مع ام واب تانيين

و كمان احيانا بننجرف وراء مشاعرنا ونتوجع ونرد ونقول احنا كمان ياريتنا عندنا ابن غيرك

طب ليه ليه ابنك قال كده ، وتتصرف معاه ازاي؟؟

• ابنك قال كده مش علشان هو بيكرهك فعلا ، لا بس علشان هو موجوع و في احساس داخلي عنده بالألم.
• ابنك قال كده علشان يحسسك انه موجوع وينتقم لانك ممكن تكون سبب في احساسه ده.
• ابنك قال كده علشان يحس انه شخص موجود ليه تفكير مستقل عنك وعلشان يحس بالانتماء والاهميه.

طب نعمل ايه لو الطفل قال كده؟

1. فكر وخد وقت مستقطع متردش الانتقام والوجع بوجع اعرف انك انت كبير وانت تقدر تتحكم في مشاعرك هو لسه مش قادر يتحكم في مشاعره لان لو رديت الوجع بوجع هتفضلوا انتوا الانتين في دايرة انتقاميه مش هتخلص.
2. اعرف انك لو فضلت في الدايره الانتقاميه دي ابنك ممكن يعمل حاجه مش متوقعه بل ممكن يدخل في ايذاء نفسه علشان بس يوجعك وياخد بثأره منك ، وفي أمثله كتير لاطفال هربوا من والديهم علشان بس انهم عاوزين يوجعوهم.
3. حاول تسمعه وتعرف هو متضايق وموجوع من ايه مش قادر تسمع وهو كمان خارج عن حدود اللياقه ، يبأه ابعد واكسر الدايره الانتقاميه.

 حاول تبني بينك وبين ابنك دايرة ثقة ونقاش هتكون العلاقه أحسن كتير بينكم.