الطفل سيء السلوك طفل محبط

الطفل سيء السلوك طفل محبط

أول ما تقرأي الجمله ده هتقعدي تفكري ، ليه الطفل لما بيحبط او يضايق بيعمل كده طب انا اتصرف ازاي مع السلوك السئ ده؟

:تعالي اقولك

الاطفال بيسوء سلوكهم لما يكونوا عاوزين يقولوا حاجه او في حاجه غلط فبيكون رد فعلهم بسلوك سئ ، طب انا مش فاهمه ازاي يعني؟؟

هوضحلك بمثال:

مامي كانت عندها بنوته عندها خمس سنين مامي الحمد لله ربنا رزقها ببنت كمان بيبي ، ف البنوته الكبيره قعدت تتصرف ببشاعه زي صوت عالي بقت بتصرخ عصبيه جددداااا وصل بيها الحال انها ممكن تأذي اختها الصغيره

:طيب مامي دلوقتي أدامها حل من اتنين

أ)تعاقبها علي كل سلوك سئ بيحصل منها

ب)تعرف اصلا ايه سبب سوء السلوك ده وتقضي عليه

الام كانت واعيه وعارفه ان البنت خايفه ان اختها البيبي تسحب البساط في الاهتمام فعلشان تقول لماما انا موجوده ، سلوكها ساء

“ماما اتناقشت مع البنت و قالتلها ” تعرفي ياحبيبتي ان انا بحبك اوي ومقدره قد ايه انتي بتحبيني”

الام هنا اتعاطفت مع البنت بالرغم من سوء سلوكها بس مش معني تعاطفها وحبها ليها انها موافقاها علي السلوك الغلط ،الام قالت لبنتها كمان طيب عارفه اني مره اتضايقت انا من مامتي لما حسيت ان في بيبي  جاي اللي هي خالتك……. عارفاها ؟
طيب ياحبيبتي دلوقتي اختك صغيره ومحتاجه رعايتنا ليها ، تفتكري تقدري تساعديني ازاي علشان نربي اختك ونكبرها سوا؟

. البنت اترمت في حضن مامتها وقالتلها ممكن اجيبلك البيبرونه وممكن كمان اساعدك وانتي بتغيريلها البامبرز وابتدت البنت تفهم مدي حب امها ليها وان اختها فعلا محتاجه مساعده-

طيب تفتكري لو الام مش كانت واعيه وعاقبتها علي السلوك السئ اللي ظاهر بس ، تفتكري البنت كانت هتعرف ان امها بتحبها بالعقاب؟*

طيب تفتكري سلوكها السئ كان وقف بالعقاب ولا كانت هتبتكر سلوكيات اسوء ف أسوء عشان تعبر عن احتياجها للحب في الوقت ده؟* 

. الخلاصه هنا ان لازم تخليكي دايما مركزه  مع سبب السلوك مش مع السلوك نفسه ، انا عارفه ان التربيه مجهده بس ولادنا يستاهلوا نتعلم عشانهم